Urubyiruko 1,000 ruturutse mu turere two mu Ntara y’Iburengerazuba rwaganirijwe n’abayobozi batandukanye na ba rwiyemezamirimo ku bijyanye  n’indangagaciro zikwiye kubaranga ku murimo habahwa amakuru yabafasha gutera imbere mu mwuga bifuza kugana, ni igikorwa cyiswe mu rurimi rw’Icyongereza Career Orientation Fair.

Icyo gikorwa cyabereye mu nzu mberabyombi y’urubyiruko mu Karere ka Karongi kuwa Kabiri tariki 14 Ugushyingo 2023, ahari urubyiruko rwiga mu mashuri yisumbuye n’urundi rukora imirimo itandukanye.

Umuyobozi w’Akarere ka Karongi wungirije ushinzwe imibereho myiza Madamu MUKASE Valentine yahaye ikaze abitabiriye iki gikorwa gitanga icyerekezo ku rubyiruko rw’u Rwanda ngo bazavemo abakozi beza igihugu gikeneye. Yungamo ko ari umwanya wo gutekereza ku buryo bwo gufasha urubyiruko rugatinyuka rukabyaza hakiri kare amahirwe atandukanye igihugu cyabageneye, bityo ngo nk’ubuyobozi bwiteguye gukora ibishoboka byose ngo urubyiruko rubeho neza, rwigirira akamaro ndetse n’igihugu.

Mu kiganiro yagejeje kuri uru rubyiruko, Minisitiri w'Urubyiruko Dr. Utumatwishima Jean Nepo Abdallah yarushishikarije gukunda umurimo,kuba abakorerabushake bitabira ibikorwa bitandukanye byubaka Igihugu, kwihugura mu bumenyi butandukanye no kumenya indimi kugira ngo bashobore guhatana n'abandi.

Mu butumwa bwatanzwe n'Abayobozi ndetse na ba rwiyemezamirimo, basabye urubyiruko; kwirinda guta ishuri  kuko ariho bakura ubumemyi bazifashisha mu gushaka no gukora imirimo  ibateza imbere, kwirinda ibiyobyabwenge, kwigirira ikizere no kugira intego ku byo bifuza kugeraho.

Urwo rubyiruko rwasuye  ibikorwa byari aho bya RDB, Future Business ifite uruganda rukora amatafari, Hotel Bethany n’ Ishuri rya UTB, bahaye urwo rubyiruko amakuru atandukanye yabafasha guhangana ku isoko ry’umurimo ndetse n’amahirwe ahari babyaza umusaruro.

Mu baganirije urubyiruko barimo umuhanzi BWIZA,  rwiyemezamirimo Albert Munyabugingo ufite ikigo cya Vuba Vuba Africa LTD giherutse gutsindira igihembo mu marushanwa ya Africa's Business Heroes (ABH) aterwa inkunga n’umuherwe Jack Ma, harimo kandi ba rwiyemezamirimo Sam Mugesera na Aimable Urimubenshi.

Hatanzwe ikiganiro ‘Indangagaciro n’imyitwarire bikwiriye urubyiruko’, cyatanzwe na Lt. Col. Sosthene Kabayiza, Dr. Jean Pierre Nkunzimana umuyobozi w’ibitaro bya Murunda na Tetero Odile, umuganga akaba n'umukinnyi w’ikipe y’abagore y’ingabo z’u Rwanda ikina basketball (APRWBBC), ni ikiganiro cyayobowe na Hon. Depite IMANIRIHO Clarisse.