Mu cyumba cy’ingoro y’ibidukikije giherereye mu Kagari ka Kibuye urubyiruko rw'umurenge wa Bwishyura rwasuwe n'itsinda ryaturutse muri Minisiteri y’ubumwe bw’Abanyarwanda n’inshingano mboneragihugu, Tariki ya 5 Kanama 2025, muri gahunda yari ifite insanganyamatsiko igira iti :Dusure ingoro ndangamurage  tumenye amateka.

Ibyakozwe birimo gusura amateka ari mu ngoro y'Ibidukikije no kuyasobanurira urubyiruko, kurubaza urubyiruko ibyo rwabonye  no kurutoza kuvuga neza ururimi rw' ikinyarwanda, gukosora interuro no gusakuza.

Abitabiriye iki gikorwa barimo Umuyobozi w’Akarere wungirije ushinzwe imibereho myiza, Madamu Umuhoza Pascasie, Nizeyimana Innocent (MINUBUMWE), umuyobozi mu Nteko y’Umuco MUGIRAMAHORO Wilhelm, Umukozi ushinzwe itorero ku Karere, umukozi ishinzwe Imiyoborere Myiza mu Murenge wa Bwishyura, urubyiruko rurimo urw’abakorerabushake ndetse n’itangazamakuru.

Mu gutangiza ibi biganiro, Visi Meya Ushinzwe Imibereho Myiza y'Abaturage mu Karere Umuhoza yabwiye ababyitabiriye ko bagomba kwita ku murage uri mu Karere kabo ndetse no kurangwa n'indangagaciro z'umuco nyarwanda.

Abitabiriye iyi gahunda, bishimiye gusura Ingoro y'Umurage w'Ibidukikije basobanurirwa byinshi mu bimuritsemo nk'amabuye y'agaciro aboneka mu Rwanda, ibinyabuzima, ibimera byifashishwaga mu buvuzi gakondo, ingufu zitanga amashanyarazi n'ibindi. Nyuma yo gusura Ingoro, urubyiruko ruri kurushanwa binyuze mu bibazo bari kubazwa bishingiye ku byo babonye basura, ibisakuzo ndetse no kunoza ururimi rw'ikinyarwanda muri gahunda ya ntibavuga, bavuga. Iyi gahunda yakozwe ku bufatanye na Minisiteri y'Ubumwe bw'Abanyarwanda n'Inshingano Mboneragihugu, Inzego z'ibanze na Radio/TV 10.

Mu gusoza ibi biganiro byaberaga ku ngoro y'Umurage w'Ibidukikije iherereye, ababyitabiriye barushije abandi gusubiza neza ibibazo babajijwe bahawe ibihembo birimo ibitabo.

Mu ijambo risoza ibi biganiro, Bwana Nizeyimana Innocent wari uhagarariye Minisiteri y'Ubumwe bw'Abanyarwanda n'Inshingano Mboneragihugu yasabye urubyiruko kwiyemeza gusura ahantu ndangamurage, Ndangamateka n' ingoro ndangamurage ziri mu gihugu ndetse no guharanira kuvoma indangagaciro z'umuco nyarwanda mu mateka y'igihugu.