Ku wa 13 Kanama 2025, Urubyiruko rw’Abakorerabushake mu Karere ka Karongi rwifatanyije n’Isi yose by'umwihariko urubyiruko rwo mu Karere ka Karongi kwizihiza Umunsi Mpuzamahanga w’Urubyiruko ufite insanganyamatsiko igira iti: “Kubaka ubushobozi bw’urubyiruko hagamijwe iterambere rirambye”. 

Uyu munsi wagizwe umwanya wihariye wo guhuza urubyiruko mu biganiro, ibikorwa by’iterambere, n’imyidagaduro, hagamijwe kwimakaza uruhare rw’urubyiruko mu kubaka ejo hazaza h’igihugu.

Uko uyu munsi wizihijwe mu mirenge itandukanye:

MUBUGA: Urubyiruko rwizihije Umunsi Mpuzamahanga w’Urubyiruko ku nsanganyamatsiko “Kubaka ubushobozi bw’urubyiruko hagamijwe iterambere rirambye”, ruhanwa ibiganiro ku mahirwe n’imirimo igamije gukemura ibibazo by’abaturage, hanabaho imyidagaduro.

By'umwihariko mu Murenge wa Rubengera, habereye umwiherero w'urubyiruko wabaye mu minsi ibiri kuva ku wa 12-13/08/2025 aho Uhagarariye urubyiruko yaganirije urubyiruko uruhare rw’Urubyiruko mu Cyerekezo 2050 nk’imbaraga z’Igihugu zubaka kandi vuba.

 GISHYITA: Hatangijwe icyumweru cy’urubyiruko gihuzwa n’Intore mu biruhuko, hatangwa ibiganiro ku burenganzira bw’umwana no ku kwizigamira, hakorwa imikino n’imyidagaduro.

RUGABANO: Urubyiruko rwakoze ibikorwa byo kubumba no gutunda amadafari no kubaka ubwiherero ku batabufite.

MURUNDI: Hakozwe umuganda wo kubakira ubwiherero umuturage utishoboye, hatangwa ikiganiro cy’umunsi, hanyuma habaho umukino w’umupira wahuje utugari, Kareba na Kabaya batsinda Nyamushishi 4–2.

MUTUNTU: Urubyiruko rw’Abakorerabushake bakoze umuhanda werekeza aho hubakwa abaturage bahuye n’ibiza no gucukura umusingi, batanga ibiganiro ku rubyiruko n’abategarugori, banitabira gahunda nzamurabushobozi. Abitabiriye: 197.

 RUGANDA: Ku ishuri rya ES Ruganda hizihirijwe Umunsi Mpuzamahanga w’Urubyiruko ku nsanganyamatsiko “Kubaka ubushobozi bw’urubyiruko hagamijwe iterambere rirambye”. Hatanzwe ibiganiro n’ubutumwa bushishikariza urubyiruko gukora, gukorana n’ibigo by’imari, guhanga imirimo, kwirinda ibiyobyabwenge no gukoresha amahirwe y’igihugu.

Ibi bikorwa byakozwe ku munsi wihariye byagaragaje ubwitange, ubufatanye n’ubushake bwo gukorera hamwe mu rubyiruko rwa Karongi, mu gukemura ibibazo by’abaturage no kwimakaza iterambere rirambye. Urubyiruko rwasabwe gukomeza kuba imbaraga z’igihugu, gukora kinyamwuga, no gukoresha amahirwe ahari mu guhanga udushya no guteza imbere imibereho myiza y’abaturage.