Nyuma yo gusurwa na Komite y'Urubyiruko rw’Abakorerabushake ku rwego rw'Akarere, imwe mu myanzuro yafashwe harimo gusura utugari tugize imirenge, ni muri urwo rwego abagize komite y’uru rubyiruko mu  Murenge wa Rubengera batangiye gusura urwo mu tugari mu rwego rwo kunoza iyo mikorere n'imikoranire no gukangurira urubyiruko kwishakamo ibisubizo.

Ku wa Kane tariki ya 4 Nzeri 2025, batangiye basura  Akagari ka Bubazi. Ni igikorwa cyari kigamije kurebera hamwe imikorere n’imikoranire y’urubyiruko n’inzego z’ibanze, gukumira no kurwanya ibyaha, gusangiza amahirwe urubyiruko ndetse no gushyiraho no kuzuza inzego z’urubyiruko ku rwego rw’Akagari.

Bimwe mu byaganiriweho birimo imikorere n’Imikoranire, ahasuzumwe uko urubyiruko rw’Abakorerabushake rukorana n’inzego z’ubuyobozi bw’ibanze mu guteza imbere ibikorwa by’iterambere n’ubwitabire mu bukangurambaga butandukanye.

Urubyiruko rwahawe amakuru ku mahirwe atandukanye arugenewe (nk’ayogukora imishinga iciriritse, ubufasha mu kwihangira imirimo, kwiga imyuga y’Igihe gito, n’ibindi), runakangurirwa kuyabyaza umusaruro.

Hakozwe igikorwa cyo kuzuza inzego z’Urubyiruko ku rwego rw’Akagari ka Bubazi. Ni igikorwa cyitabiriwe n’urubyiruko rutandukanye hamwe n’inzego z’ubuyobozi nk’uko byagaragajwe haruguru.

Igikorwa cyasojwe n’impanuro zitandukanye zahawe urubyiruko, zirimo gukomeza kwitanga mu bikorwa by’iterambere, kwigirira icyizere, kumenya amahirwe arugenewe no kugira uruhare mu Iterambere.