Ku bufatanye bw’Akarere n’umushinga Caritas Rwanda USAID Igire Gimbuka hatanzwe ibikoresho bitandukanye ku rubyiruko 70 rurangije amasomo y’imyuga n’ubumenyingiro barimo abakorewe ihohoterwa rishingiye ku gitsina, abakomoka mu miryango itishoboye yagaragayemo ibibazo.

Abahawe ibi bikoresho ni abize ubukanishi bw’ibinyabiziga, gusudira no kudoda; birimo imashini zidoda, amasupani n'imashini zisudira.

Umuyobozi w’Akarere wungirije ushinzwe imibereho myiza, Madamu UMUHOZA Pascasie yabasabye kubyaza umusaruro amahirwe bahawe ngo biteze imbere, asezeranya kuzakomeza gukurikirana urwo rubyiruko no kurugira inama mu gukoresha neza no gucunga uko bikwiye ibyo bikoresho bahawe.

Ku bufatanye bw’akarere n’umushinga Caritas Rwanda USAID Igire Gimbuka hasojwe igikorwa cyo gutanga serivisi zikomatanyije ku bangavu babyaye imburagihe. Ni igikorwa cyatangiye kuwa kabiri tariki 27/2/ 2024 gisoza kuwa Kane tariki 29/2/2024.

Abangavu baganirijwe kuri serivisi zitandukanye banazihabwa; ubujyanama mu isanamitima no mu by’amategeko, gupimwa indwara, gufashwa kwandikisha abana mu irangamimerere no kubapima imirire.

Cyasojwe abangavu bahuzwa n’ababyeyi babo; baganirizwa ku ihohoterwa rishingiye ku gitsina, uburenganzira bw’umwana n’amategeko bakwiyambaza mu kugaragaza ihohoterwa bakorewe. Ababyeyi basabwe kudatererana abana babo n'abuzukuru babo.