Ku wa 16 Gashyantare 2025, habaye umwiherero wahuje abakozi bose kuva ku Karere kugera ku Kagari. Umwiherero wayobowe n’Umunyamabanga wa Leta muri Minisiteri y’Ubutegetsi bw’Igihugu Hon. Kayisire Marie Solange kandi yitabirwa na Guverineri w’Intara, Umuyobozi w’Akarere n’Inzego z’Umutekano.

Hon. Kayisire yasabye abayobozi gutanga serivisi nziza, agira ati “Twibuke ko turimo guteza imbere Igihugu. Kandi Igihugu si imisozi, ni umuturage.Turasabwa guteza imbere umuturage, tumuha serivisi nziza, twirinda kumusiragiza.|

Yasabye kandi kurwanya bivuye inyuma ingengabiterekezo ya Jenoside n’igisa nayo cyose kuko nta kindi imaze uretse kuganisha igihugu ahabi.

Yasabye abayobozi, kurangwa n’imikorere n’imikoranire n’ubufatanye kugirango babashe kurangiza inshingano zabo neza.

 Muri uyu mwiherero hatanzwe ibiganiro bikurikira:

1. Ubushakashatsi bwa 2024 bugaragaza ishusho y’uko abaturage babona imiyoborere n’imitangire ya serivisi mu nzego zibegereye
2. Ubumwe n’ubudaheranwa
3. Umutekano w’Igihugu no mu Karere
4. Gahunda y’Igihugu yo Kwihutisha Iterambere/ NST2
5. Imyitwarire mbonera, imikorere n’imikoranire mu kugera ku ntego z’iterambere ry’Igihugu
6. Ihame ry’uburinganire no kurwanya ihohoterwa rishingiye ku gitsina.\

Imyanzuro yafatiwemo ni iyi ikurikira:

1. Kuzamura ikigero cy’imikorere n’imikoranire biganisha kuri serivisi iboneye ku baturage no kwishyira mu mwanya w’abo duha serivisi
2. Guharanira imikorere n’imikoranire izana impinduka binyuze mu gushyira mu bikorwa gahunda za leta mu bufatanye bunoze n’inzego zose dufatanya
3. Gushyira imbaraga mu guhora twihugura no guhanga udushya kugirango duhore dutanga umusaruro uboneye mu nshingano twaragijwe n’Igihugu
4. Gushyiraho uburyo abantu bwo gusesengura amateka, gucukumbura imizi y’ingengabitekerezo no kuyirandura kugirango tubashe kubaka u Rwanda twifuza
5. Kwemera no kwishimira kujyirwa inama ndetse no kwemera kubazwa inshingano ku ruhare rwacu mu bitagenze neza
6. Gushyiraho ingamba zo kubungabunga umutekano
7. Gukora inshingano zacu mu bwiyoroshye n’ubwubahane haba mu bo dukorera ndetse n’abo dukorana
8. Gukumira icyo ari cyo cyose gishobora gushaka kudusubiza inyuma cyangwa gusenya ibyagezweho binyuze mu gutanga amakuru ku gihe
9. Kubakira ku mahirwe ahari, ibyagezweho no kubakira ku ngero z’ubwitange no gukunda Igihugu kugirango tubashe kugera kuri byinshi kurushaho mu bushobozi Igihugu kiduha butandukanye n’ubwo abageze kuri byinshi mbere yacu bari bafite.