Abatuye mu mirenge itandukanye y’akarere ka Karongi bahawe amatungo n’ibindi bikoresho, ku munsi mpuzamahanga w’umugore wizihijwe tariki ya 8 Werurwe 2023.

Amatungo yatanzwe ku bufatanye bw’Akarere ka Karongi n’abafatanyabikorwa bako harimo inka eshatu zatanzwe muri gahunda ya Girinka Munyarwanda, aho abahoze batishoboye bazihawe bituye bagenze babo batatu mu Murenge wa Ruganda. Igikorwa nk’icyo cyabereye mu Murenge wa Murundi aho imiryango ibiri yituye inyana ebyiri.

Mu Murenge wa Ruganda kandi hatanzwe inkoko ku miryango yorojwe n’Umushinga PRISM-IFAD na bo boroje bagenzi babo. Igikorwa nk’icyo cyabereye mu murenge wa Murundi kizanakomeza n’ahandi.

Mu murenge wa Ruganda kandi, Umushinga CARITAS IGIRE GIMBUKA wahaye amafaranga miliyoni 12 n’ibihumbi 250 abagenerwabikorwa bayo bagizwe n’abagore n’abana. Buri mugore yagenewe ibihumbi 150 Frw yo gukoramo umushinga umuteza imbere, abana bagenerwa ibihumbi 15 Frw byo kubatoza kwitabira ubworozi bakiri bato.

Ku bijyanye n’ibikoresho CARITAS IGIRE GIMBUKA yageneye abagore 25 bo muri uwo murenge telefoni nto zizabafasha mu bijyanye no kwitabira ikoranabuhanga mu bimina babarizwamo , ku bijyanye no kubitsa no kugurizanya. Mu murenge wa Murundi naho imiryango itanu yahawe telefoni zigezweho na radiyo enye.

Umushinga Food for the Hungry watanze amagare ku bafite ubumuga barimo abana n’abakuru, mu gihe umushinga HDI watanze ibikoresho byo kwa muganga. Abandi bafatanyabikorwa barimo RWAMREC na Action Aid bagiye batanga ubufasha butandukanye ngo ibyo birori bigende neza hirya no hino mu mirenge y’Akarere ka Karongi.