Kuri uyu wa Gatandatu, tariki 06/04/2019, Akarere ka karongi kakiriye itsinda ry'abashyitsi baturutse mu Gihugu cy'Ubudage bari baje muri gahunda y'Ubufatanye bwa Komini ya Bad Krueznach, yo mu Ntara ya Rhenanie Palatinat, n'Akarere ka Karongi. Iri tsinda ry'Abashyitsi ryari riyobowe na Minisitiri w'Ubutegetsi na Siporo, Bwana Roger Lewentz, wari kumwe n’Umuyobozi w’Ikigo cy’Igihugu Gishinzwe Uburere mboneragihugu, Bernhan Kukatzki, n’abandi bari bazanye. Aba bashyitsi bakiriwe n’Umuyobozi w’Intara y’Iburengerazuba, Hon. Alphonse MUNYANTWALI wari kumwe na Komite Nyobozi y’Akarere ka Karongi yari iyobowe n’Umuyobozi w’Akarere, Francois NDAYISABA. Uruzinduko rw’aba bashyitsi rwaranzwe n’ibiganiro bifata ingamba ku bufatanye bw’ impande zombi cyane cyane hibandwa ku miturire n’ubukerarugendo. Bikazajya bikorwa mu buryo bw’ihererekanyabumenyi ndetse no gusangira amakuru hashingiwe ku bunararibonye bwa buri ruhande. Mu ijambo rye Umuyozi w’Intara y’Iburengerazuba, yashimiye imikorere n'imikoranire myiza hagati y’impande zombi mu Iterambere abizeza ko bazakomeza gukorana neza, anabashimira ko baje gusura u Rwanda mugiye cyo kwibuka kunshuro ya 25 Jenocide Yakorewe Abatutsi, aho yavuze ko “Inshuti uyibona mu byago.” Ubufatanye hagati y’Intara ya Rhenanie Palatinat bumaze igihe, gusa muri iyi minsi ubu bufatanye bukaba bufite byinshi bwitezweho cyane cyane mu kunoza imiturire n’ubukerarugendo. Ibi bizakorwa habayeho gukora ingendo shuri aho nko mu cyumweru gishize itsinda ry’ aba Engineers baturutse muri Komini ya Bad Krueznach bafatanyije n’aba Engineers b’Akarere barakoranye banasura ibikorwa bitandukanye. Twakwibutsa ko mu mpera z’Umwaka ushize, Itsinda riyobowe n’Umuyobozi w’akarere ka Karongi bagiriye uruzinduko rw’Akazi mu Budage muri Komini ya Bad Krueznach mu rwego rwo guteza imbere ubu bufatanye.