Ku rwibutso rwa Jenoside yakorewe Abatutsi rwa Gatwaro mu Murenge wa Bwishyura, kuri uyu wa 18 Mata 2024, habereye igikorwa cyo kwibuka ku nshuro ya 31 Jenoside yakorewe Abatutsi, ahaza gushyingurwa imibiri 117. Hari umushyitsi Mukuru Madamu Mukantaganzwa Domitilla, Perezida w’Urukiko rw’Ikirenga.

Byiringiro Benjamin mu buhamya bwe, yagaragaje uko yarokotse wenyine mu muryango w’abana 8 bavukanaga, arokowe n’ingabo zari iza FPR Inkotamyi. Yagaruye icyizere n'icyanga cy’ubuzima, yigisha muri kaminuza ndetse yongeye kugira umuryango.

Muhayimana Bosco, mu izina ry’abafite ababo bashyinguye n’abashyingurwa mu rwibutso rwa Gatwaro yasabye kwerekana imibiri y’abazize Jenoside ngo bashyingurwe mu cyubahiro; nibatabikora imisozi izavuga. Yasabye kwita ku rubyiruko rurimo kugaragaza ingengabitekerezo ya Jenoside.

Meya MUZUNGU Gerald yihanganishije abarokotse Jenoside yakorewe Abatutsi, asaba abagifite ingingimira kuri iyo Jenoside, gusura urwibutso rwa Gatwaro n’izindi ziri hirya no hino bakirebera amateka yayo; uko yateguwe n’uko yashyizwe mu bikorwa mu bugome ndengakamere.

Perezida wa Ibuka mu Karere, Ngarambe Vedaste ahereye ku mibiri 117 yashyinguwe none n’indi izashyingurwa ku buryo yose hamwe izaba isaga 300 muri uyu mwaka, yibukije ko abazi ahari itarashyingurwa,baherekana bakareka kurushwa ubugwaneza n’ibiza bituma hari imibiri iboneka.

Madamu Mukantaganzwa yasabye ubuyobozi bw’inzego z’ibanze gukomeza gukumira no kurwanya ingengabitekerezo ya Jenoside ikigaragara muri bamwe mu baturage no gukomeza kubasaba bakerekana ahari imibiri y’abazize Jenoside yakorewe Abatutsi kugirango ishyingurwe mu cyubahiro.

Perezida w'Urukiko rw'Ikirenga, Hon Mukantaganzwa Domitilla mu gikorwa cyo kwibuka ku nshuro ya 31 Jenoside yakorewe Abatutsi cyabereye ku rwibutso rwa Gatwaro, yihanganishije abafite ababo bazize Jenoside, abasaba guhora babazirikana buri gihe.

Igikorwa cyo kwibuka ku nshuro ya 31 Jenoside yakorewe Abatutsi, cyabereye ku rwibutso rwa Gatwaro cyasojwe no gushyingura mu cyubahiro imibiri 117 yabonetse mu Mirenge 5 y’aka Karere, ndetse no gushyira indabyo ku mva ziruhukiyemo imibiri muri uru rwibutso.