Ku uyu wa gatatu tariki ya 25 Kamena 2025 mu karere ka Karongi hizihijwe umunsi w’umwana w’umunyafurika ku rwego rw'Akarere, ibirori byabereye mu murenge wa Rubengera. Abana basabanye mu ndirimbo, imbyino no mu mivugo birimo ubutumwa bwo kurengera umwana no kumurinda ihohoterwa ndetse no guha amahirwe angana n’ayabandi ku bafite ubumuga. 

Uyu munsi warI ufite insanganyamatsiko ya “ Ndera Neza, Nkure Nemye” yagarutsweho n’abafashe ijambo bose mu ibi birori.

Umuyobozi w’ishami ry’ubuzima mu Karere ka Karongi,  Mahoro Barera Pacifique yasabye abana gukunda ishuri anabibutsako hari bagenzi bababo bataye ishuri banze kwiga kandi ko bashaka ko nabo bagaruka bakiga nk'abandi kuko aribo bayobozi b'ejo. Yanaboneyeho no kubibutsa ko nubwo bagiye mu biruhuko gahunda yo gufasha abana batatsinze neza mu ishuri ihari kandi anabasaba kuzayitabira. 

Umuyobozi w’Akarere wungirije ushinzwe iterambere ry’ubukungu, Ntakirutimana Julienne, mu butumwa bwe yageneye abana kuri uyu munsi yagarutse ku biruhuko bagiye kujyamo ko atari umwanya wo kwiga ingeso mbi, bifata nabi, basuzura ababyeyi ahubwo ko ari umwanya wo guca bugufi bakumvira ababyeyi, birinda kwirirwa mu muhanda n'ahandi, bakaba mu rugo, bagakora uturimo two mu rugo tworoheje tutavuna abana nko koza ibyombo, gufura imyenda yabo, gukubura no gusubira mu masomo ndetse no kubaha ababyeyi n’abakuze bose.

Muri ibi birori, abafatanyabikorwa batandukanye barimo World vision, Caritas Rwanda na Rewu batanze ibikoresho by’ishuri ku banyeshuri barangije mu mashuri y’imyuga, banahebye kandi na club ya mbere n’iyakabiri zatsinze muri child protection, baboneraho no guhemba ikipe yabaye iya mbere ku mashuri mu irushanwa Kagame Cup.