Umuyobozi w’Akarere ka Karongi Madamu Mukarutesi Vestine ari kumwe na Perezida w’Inama Njyanama y’Akarere ka Karongi n’abagize inzego z’umutekano bishimanye n’abatuye aka karere bataha inzu 102 zubakiwe abasenyewe n’ibiza byatewe n'imvura nyinshi yaguye mu ntangiriro za Gicurasi 2023.

Ni umuhango waranzwe no kugaruka ku butwari bw’ingabo zahoze ari iza FPR Inkotanyi zabohoye igihugu zigahagarika Jenoside yakorerwaga Abatutsi zirangajwe imbere na Nyakubahwa Perezida wa Repubulika Paul Kagame, wari umugaba mukuru wazo icyo gihe.

Ibirori ku rwego rw'akarere byabereye mu Murenge wa Bwishyura byabanjirijwe no gutaha ibyumba bitatu bitatu by’ishuri byubatswe ku GS Ruragwe iherereye mu Murenge wa Bwishyura, hakurikiraho gutaha inzu yubakiwe uwagizweho ingaruka n’ibiza utuye muri ako gace. Nyuma hatashywe izindi zitandukanye zo muri uwo murenge.

Abazubakiwe bashimiye ubuyobozi bw’igihugu butabibagiwe, ahubwo bwabafashije kuva bahura n’ibiza; bukabacumbikira kugeza bubakiye n’inzu zo kubamo.

Mu butumwa yatanze, umuyobozi w'Akarere yasabye abaturage gusigasira ibyagezweho, bakagira uruhare mu rugamba rw'iterambere igihugu kirimo nyuma yuko urw'amasasu rusojwe.

Si izo nzu gusa 102 zatashywe, kuko no mu Murenge wa Mutuntu hatashywe amashanyarazi yahashyizwe, azacanira santeri ya Mukungu, ibiro by'umurenge n'isoko ryaho.

Nyuma y'ibirori habaye amarushanwa atandukanye arimo akomatanyije yo koga mu mazi, gusiganwa ku magare no ku maguru ndetse n'umupira w'amaguru.