Ku wa 25 Werurwe 2025, mu Karere ka Karongi, mu Nteko z'abaturage, hatangijwe icyumweru cyahariwe kwimakaza ihame ry'uburinganire, insanganyamatsiko igira iti: "Twimakaze ihame ry'Uburinganire, dushyira umuturage ku isonga." Iki cyumweru cyatangirijwe mu Murenge wa Gitesi, mu Kagari ka Gasharu, mu Mudugudu wa Gasharu, aho abitabiriye baturutse mu nzego zitandukanye zo mu Karere ka Karongi. 

Abayobozi bitabiriye iyi gahunda ni: Umuyobozi w'Akarere Wungirije Ushinzwe Imibereho myiza, Madamu UMUHOZA Pascasie, Umuyobozi wa Police mu Karere ka Karongi, Umuyobozi wa RIB mu Karere ka Karongi, Uhagarariye NISS mu Karere, Umunyamabanga Nshingwabikorwa w’Umurenge wa Gitesi, Uhagarariye Tubibe Amahoro, Umukozi wa Isange One Stop Center ku Bitaro Bikuru bya Kibuye, Umukozi Ushinzwe Uburinganire n'Iterambere ry'Umuryango, Umukozi Ushinzwe Imiyoborere myiza, Inzego z'abagore mu Murenge.

Ibiganiro byatanzwe birimo: Uburinganire, gukumira no kurwanya ihohoterwa rishingiye ku gitsina, Amategeko n'ibihano bijyanye n'ihohoterwa rishingiye ku gitsina n'amakimbirane mu miryango, Serivisi za Isange One Stop Centers zihabwa abahuye n'ihohoterwa rishingiye ku gitsina. 

Umuyobozi w'Akarere Wungirije Ushinzwe Imibereho myiza, Madamu UMUHOZA Pascasie, yahaye ubutumwa bw'uyu munsi, asaba abitabiriye kwimakaza ihame ry'uburinganire mu miryango, avuga ko bizabafasha kwiteza imbere no kubaka umuryango ushoboye kandi utekanye. Yanakanguriye abitabiriye kwitabira gahunda ziteganyijwe muri iki cyumweru cyahariwe ihame ry'uburinganire. 

Iki gikorwa kigamije gufasha abaturage kumva no gushyira mu bikorwa ihame ry'uburinganire, mu rwego rwo guteza imbere imibereho myiza y'abaturage no kurwanya ihohoterwa rishingiye ku gitsina.