Mu karere ka Karongi hatangijwe ku mugaragaro icyiciro cya 2 cy’imishinga; ugamije guteza imbere inka zitanga umukamo, RDDP II (“Rwanda Dairy Development Project) ugiye kuhakorera bwa mbere, n’ugamije kwagura ubuhinzi mu buryo burambye no kwihaza mu biribwa, SAIP II. Yombi ibarizwa mu kigo cy’igihugu gishinzwe guteza imbere ubuhinzi n’ubworozi(RAB).

Ubuyobozi bw'Akarere bwari buhagarariwe n’umuyobozi wako wungirije ushinzwe imibereho myiza, Madamu UMUHOZA Pascasie bwavuze ko bwishimira umusaruro watanzwe na SAIP mu kuzamura ubukungu n'imibereho myiza y'abaturage mu gihe cy’imyaka 5 imaze ihakorera. Bwijeje ubufatanye mu bikorwa by'imishinga SAIP II na RDDP II mu cyiciro cya kabiri, yahatangijwe ku mugaragaro.

Umushinga wa ‘Rwanda Dairy Development Project (RDDP2)’, icyiciro cyawo cya kabiri, uzashyirwa mu bikorwa n’Ikigo giteza imbere Ubuhinzi n’Ubworozi (RAB) hamwe na ’Heifer International’ mu gihe cy’imyaka itandatu, hakazakoreshwa Amadolari ya Amerika miliyoni 100 n’ibihumbi 37 (akaba ahwanye n’amafaranga y’u Rwanda arenga miliyari 127).

MINAGRI ivuga ko uyu mushinga watewe inkunga n’Ikigega Mpuzamahanga giteza imbere Ubuhinzi n’Ubworozi (IFAD), uzafasha aborozi barenga ibihumbi 175 bo mu Turere 27 tw’Intara 4 zigize Igihugu, Umujyi wa Kigali na wo ukazakorerwamo ubucuruzi no gutunganya ibikomoka ku mata.

MINAGRI n’abafanyabikorwa bayo bavuga ko aborozi bazajya batererwa intanga z’inka zitanga umukamo mwinshi, bafashwe kubona ubwatsi n’amazi bihagije, hamwe n’ubumenyi bwo kwita kuri ayo matungo.