Kuri uyu wa Kane, tariki ya 26 Kamena 2025, mu cyumba cy’inama cy’Akarere ka Karongi habereye Inteko Rusange y’Inama y’Igihugu y’Urubyiruko ku rwego rw’Akarere. Iyi nama yahuje urubyiruko ruhagarariye imirenge yose igize Akarere, abayobozi b’urubyiruko, inzego z’ibanze, inzego z’umutekano, ndetse n’abafatanyabikorwa batandukanye.

Ni igikorwa cyitabiriwe kandi n’abarimo Umuyobozi w'Akarere ka Karongi, Umuyobozi wa Polisi mu Karere,  Komiseri Ushinzwe Ubukungu muri komite y'inama y'Igihugu y'Urubyiruko ku rwego rw'Igihugu, abagize Komite y'inama y'Igihugu y'Urubyiruko ku rwego rw'Akarere, Komite Nyobozi y'Urubyiruko rw'Abakorerabushake ku rwego rw'Akarere, Umuganga watanze Ikiganiro kirebana n'uruhare rw'urubyiruko mu kwirinda ibiyobyabwenge, Komite n'Urugaga rw'urubyiruko Ku rwego rw'Akarere, Abahuzabikorwa b'urubyiruko rw'Abakorerabushake ku rwego rw'umurenge (Bose), Uhagarariye urubyiruko rwiga muri Kaminuza ya PUR Karongi na IPRC Karongi, Abahuzabikorwa n'Inama y'Igihugu y'Urubyiruko ku rwego rw'umurenge n'utugari, Urubyiruko rw'abikorera, Abahagarariye urugaga rw'Urubyiruko Ku rwego rw'umurenge, Abahanzi, Abikorera, Abahagarariye amadini n'amatorero mu Rubyiruko N’Abahagarariye abamotari n'abanyonzi;

Inama yatangijwe ku mugaragaro n’Umuhuzabikorwa w’Inama y’Igihugu y’Urubyiruko mu Karere, washimiye urubyiruko ku bw’ubwitabire ndetse agaragariza umushyitsi mukuru, Umuyobozi w’Akarere imyitwarire n’ubwitabire bw’urubyiruko kuri buri murenge.

Intego y’Inama yari ugusuzuma ibikorwa byagezweho n’Inama y’Igihugu y’Urubyiruko mu mwaka w’ingengo y’imari 2024–2025, kuganira ku ruhare rw’urubyiruko mu kubaka igihugu no kubyaza umusaruro amahirwe ahari no guhabwa ibiganiro by’ubukangurambaga no kongererwa ubumenyi ku nsanganyamatsiko zitandukanye zirimo; uruhare rw'Urubyiruko mu kurwanya ibiyobyabwenge. 

Umuyobozi w’Akarere ka Karongi: Yibukije urubyiruko ko ari inkingi y’iterambere ry’igihugu, arugaragariza ko ibikorwa byabo bigaragara ku rwego rw’Akarere, cyane cyane abakorerabushake. Yashishikarije urubyiruko gukura amaboko mu mifuka, kwihangira imirimo, gutekereza kure, kwiga imyuga, gukora ubworozi n’ubuhinzi, no kumenya umuhamagaro wabo.

Umuhuzabikorwa w’Inama y’Igihugu y’Urubyiruko – Madamu Isingizwe Benithe: Yasobanuye ibikorwa byakozwe mu mwaka wa 2024–2025, ashingiye ku nkingi eshatu (Ubukungu, Imibereho Myiza, Imiyoborere Myiza n’Ubutabera).

Komiseri ushinzwe Ubukungu mu nama y'Igihugu Ku rwego rw'Igihugu – Madamu Uwimbabazi Zawadi: Yagaragaje amahirwe menshi ari mu gihugu urubyiruko rwakabyaje umusaruro nka YouthConnekt, Aguka Program, Road Maintenance, TVET Challenges… Yashishikarije urubyiruko kwirinda ibiyobyabwenge, gukora cyane no kwigirira icyizere.

Umuyobozi wa Polisi mu Karere yatanze ikiganiro ku ruhare rw’urubyiruko mu kurwanya ibiyobyabwenge no gusigasira ibyagezweho.

Nyuma urubyiruko rwatanze ibitekerezo birimo kubyaza umusaruro amahirwe y’igihugu mu cyerekezo 2050 binyuze mu buhinzi n’ubworozi, kwimenya no gufata inshingano aho gutegereza ababyeyi cyangwa Leta, Kuvana imyumvire ku mpamyabumenyi nk’ikintu cyonyine cyazana akazi, Gukomeza ubuvugizi ku rubyiruko ruri mu byiciro byihariye (ababyariye iwabo, abavuye mu mashuri, n’abandi).

Hafashwe kandi imyanzuro yo gukora ikusanyamakuru ryimbitse ku rubyiruko rwo mu Karere ka Karongi, rizakorwa bitarenze tariki ya 15 Nyakanga 2025, guhugura no kongerera ubushobozi inzego z’urubyiruko, gushyira imbaraga mu kubyaza umusaruro amahirwe ari mu gihugu, gukomeza ubukangurambaga bwo kwirinda ibiyobyabwenge, gutoza urubyiruko gutangira ibikorwa by’iterambere buhoro buhoro ariko bifite ireme, gukangurira urubyiruko kwimenya no kwigirira icyizere no gukora amatsinda y'Urubyiruko agamije kubateza Imbere, kwizigamira no kuba bandebereho.