Kwibuka ku nshuro ya 31 Jenoside yakorewe Abatutsi, ku rwego rw’Akarere ka Karongi byatangiriye ku rwibutso rwa Jenoside yakorewe Abatutsi rwa Gatwaro mu Murenge wa Bwishyura ahari abashyitsi barangajwe imbere na Guverineri w’Intara y’Iburengerazuba Bwana Ntibitura Jean Bosco.

Hari kandi Senateri NIYOMUGABO Cyprien; ba Depite NYIRABAZAYIRE Angelique; MUKANDEKEZI Françoise; SIBOBUGINGO Gloriose n’abandi, abashinzwe umutekano barimo umuyobozi w‘ingabo mu Ntara Maj Gen Eugene NKUBITO, uyobora inkeragutabara muri iyi ntara, Uyobora RIB mu Ntara, Perezida w’Inama Njyanama y’Akarere ka Karongi; ba visi Meya, Abagize Inama y’Umutekano y’Akarere ka Karongi; Umuyobozi w’Ibitaro Bikuru bya Kibuye; Umuyobozi wa EPR Presbytery Kirinda; Abayobozi mu nzego zitandukanye;

Mu butumwa yatanze, Umuyobozi w’Akarere ka Karongi Bwana Muzungu Gerald yatangiye ashimira abitabiriye icyo gikorwa.

Ati “Babyeyi, Bavandimwe, Nshuti mwese mwitabiriye iki gikorwa cyo gutangiza icyumweru cy’icyunamo no Kwibuka ku nshuro ya 31 Jenoside yakorewe Abatutsi mu 1994.Mbanje kubihanganisha nimukomere, mukomeze mutwaze.”

Yungamo ko ari umunsi wo  icyubahiro no kunamira Abatutsi baruhukiye kuri Kiriziya ya St Pierre, kuri Home St Jean, kuri Stade Gatwaro n’I Nyamishaba.

 Ati “Turunamira Ababyeyi, Abavandimwe n’inshuti, barenga 11,400 biciwe aha ku Kiriziya ya St Pierre, abarenga 549 biciwe kuri Home St Jean, abarenga 15,000 biciwe muri Stade Gatwaro n’abarenga 3,500 biciwe I Nyamishaba. Turazirikana kandi n’abishwe tutigeze tubona nk’abaguye mu Kiyaga cya Kivu. Aba batutsi b’inzirakarengane twunamira, bishwe urw’agashinyaguro  muri Jenoside yakorewe abatutsi mu 1994.”

Yungamo ati “Aba duha icyubahiro uyu munsi biciwe muri Kiriziya, bicwa n’abitwaga Abakristu bagenzi babo, bicirwa mu maboko y’Abihay’Imana, abandi bicwa n’Abayobozi bari barangajwe imbere na Prefet KAYISHEMA Clement, abandi bicwa n’abitwaga abahanga/ intiti z’Igihugu bigishaga muri ETO Kibuye muri EAFO Nyamishaba n’abanyeshuri baharererwaga. Turazirikana inzira ndende banyuze, uburyo bababajwe mbere yo kwicwa n’uburyo bishwe by’agashinyaguro. Nta kabuza twizera ko Imana yabakiriye kuko bapfuye bayiragiza kandi bayiringiye.”

Mu ijambo rye yagaye abateguye n’abagize uruhare muri Jenoside yakorewe Abatutsi.

Ati” Turagaya  cyane ibyo byiciro byose by’abagakwiye kuba intangarugero no kubera abandi icyitegererezo akaba aribo babavukije ubuzima babahora uko bavutse. Dushimiye cyane Ingabo z’Inkotanyi zari ziyobowe na Nyakubahwa Perezida wa Repubulika Paul KAGAME, zahagaritse Jenoside, zikarokora Abatutsi, zikagarura umutekano n’ihumure mu Gihugu. Urukundo nyakuri ubu  rwagarutse mu Banyarwanda.

Akomeza avuga ko kwibuka ku nshuro ya 31 Jenoside yakorewe Abatutsi mu 1994, ari umwanya wo kongera gutekereza ku mateka mabi yaranze Igihugu cyacu, kumva ko buri wese afite inshingano zo guharanira ko ibyabaye bitazongera ukundi, ni umwanya wo kongera gutekereza cyane ku biduhuza, tukirinda ibidutanya, turusheho kunga ubumwe, twirinde guheranwa n’amateka, twiyubake, dufatanye mu kwiyubakira Igihugu  giteye imbere, kibereye buri wese.

 Yashimiye abitabiriye icyo gikorwa cyane cyane urubyiruko kuko uyu aba ari umwanya mwiza kuri mwe wo kumenya amateka nyakuri y’ibyabaye mu gihugu cyacu no gufata imigambi myiza yo kubaka imbere heza;

Yasabye guhangana n’ibyemezo bifatwa n’Umuryango Mpuzamahanga byo kutigira ku mateka ya Jenoside yakorewe abatutsi mu Rwanda mu 1994 nkuko biri mu kiganiro cyatanzwe kigira kiti: “Jenoside yakorewe Abatutsi mu 1994, Isomo ku Banyarwanda, ku Mahanga n’Ibihugu byo mu Karere.”

Yasoje yifuriza buri wese kubaho, buri wese aharanira kubaho neza igihe cyose.