Kuri uyu wa 17 Mutarama 2019, ku Karere ka Karongi habereye igikorwa cy'Ihererekanyabubasha hagati ya Madamu MUGWANEZA Assoumpta wakoraga nk'Umunyamabanga Nshingwabikorwa w'agateganyo na Bwana KARANGWA James, Umunyamabanga Nshingwabikorwa mushya w'Akarere.

 Ni igikorwa cyayobowe n'Umuyobozi w'Akarere NDAYISABA François wari kumwe n'Umuyobozi w'Akarere Wungiririje Ushinzwe Ubukungu, Madamu BAGWIRE Esperance. Hari kandi abahagarariye inzego z'umutekano; Ingabo na Polisi ndetse n'abakozi b'Akarere.

Madamu MUGWANEZA Assoumpta yashimiye ubuyobozi bw'Akarere n'Abakozi muri rusange uko bamubaye hafi mu nshingano z'Umunyamabanga Nshingwabikorwa yari amaze umwaka afatanya n'inshingano z'umwanya w'akazi ke asanzwe akora nk'Umuyobozi w'Imirimo Rusange y'Akarere anasezeranya Umunyamabanga Nshingwabikorwa mushya ubufatanye.

Bwana KARANGWA James nawe mu ijambo rye yashimiye Ubuyobozi bw'Akarere, abakozi abaturage n'abafatanyabikorwa bako. Avugako gukorera hanwe arizo mbaraga zizatuma iterambere ry'umuturage rikomeza kuba ntamakemwa.

Umuyobozi w'Akarere mu ijambo risoza yashimiye ugiye mu nshingano n'uwazikoraga mu buryo bw'agateganyo. Yagarutse kandi ku bufatanye buranga abanyakarongi nk'ibanga ry'iterambere rigerwaho nk'uko ikivugo cyabo " UBUFATANYE, UMURIMO UNOZE TWIHUTE MU ITERAMBERE" kibivuga.