KARONGI: ISUZUMA RY’IMIHIGO YA MUTIMAWURUGO RIKOMEJE, ABATURAGE BASHIMIRWA URUHARE RWABO MU KWITEZA IMBERE

Karongi, tariki ya 13 Gicurasi 2025 – Mu rwego rwo gukomeza kwitegura isuzuma rizakorwa n’Urwego rw’Igihugu, Umukozi w’Akarere ushinzwe Uburinganire n’Iterambere ry’Umuryango, ku bufatanye n’abagize Komite y’Inama y’Igihugu y’Abagore (CNF), bakoze isuzuma ry’imihigo ya Mutimawurugo y’umwaka wa 2024/2025 mu Mirenge ya Ruganda na Murambi.

Iri suzuma ryatangiranye no kugenzura raporo z’imihigo za CNF ku rwego rw’Imirenge, rikomereza no mu bikorwa biri ku rwego rw’ibanze bifatwa nk’indashyikirwa mu gushyira mu bikorwa iyi mihigo.

Ibikorwa byasuwe birimo:

  1. Amatsinda yo kuzigama no gukoresha ikoranabuhanga: Hatanzwe urugero rw’amatsinda y’abagore ashyira imbere ikoranabuhanga mu mikorere yayo no kwizigamira bifasha abanyamuryango kwiteza imbere.
  2. Gutoza abagore n’abakobwa imyuga: Hanagenzuwe ibikorwa byo guhugura abagore n’abakobwa mu myuga n’ubumenyingiro, harebwa abamaze gufashwa n’abo bigishijwe.
  3. Kurwanya igwingira mu bana: Hagarutswe ku bikorwa byo gukumira no kurwanya igwingira hibandwa ku miryango ifite abana bato.
  4. Ubuhinzi bw’imboga: Habaye gusuzuma uko abaturage bitabira guhinga imboga mu rwego rwo kuzamura imirire n’ubukungu.
  5. Ubworozi bw’inkoko: Mu Mudugudu wa Kibamba, itsinda “Umurava” ryahawe inkoko 700 ku bufatanye n’Akarere na PRISMA. Iri tsinda ryagaragaje umuhate mu kuzitaho n’ubwitange bwo kuzibyaza umusaruro.
  6. Gahunda ya Girinka: Hasuwe kandi abaturage bahawe inka muri gahunda ya Girinka, harebwa uko bazitaho n’uko zibafasha kwikura mu bukene.
  7. Inzu z’abatishoboye: Habaye gusura inzu zubakiwe abatishoboye muri gahunda yo kubakura mu bukene hibandwa ku isuku n’imibereho yabo.
  8. Isuku y’ingo: Hasuzumwe ingo mu kureba izifite ubwiherero bufatika n’izikeneye ubufasha mu kunoza isuku.
  9. Kubana mu mahoro no gushishikariza gusezerana: Hasuwe ingo zari zibanye mu makimbirane kugira ngo harebwe intambwe zatewe mu gusubiza amahoro mu miryango. Hanashishikarijwe ababanaga batasezeranye kubikora mu rwego rwemewe n’amategeko.

Abaturage bagaragaje ko bishimiye isuzuma, bavuga ko ribongerera imbaraga zo gukomeza kwiteza imbere. Banasabwe gukomeza kwita ku iterambere ry’ubukungu n’imibereho myiza, no kunoza ibitaranoga mbere y’isuzuma rikuru rizakorwa n’Urwego rw’Igihugu.

Back