Kuri uyu wa 5 Gashyantare 2025, kuri Centre Bethel mu Murenge wa Rubengera, hateraniye Inteko Rusange y’Ihuriro ry’Abafatanyabikorwa b’Akarere (JADF). Bimwe mu byasuzumiwemo  birimo kurebera hamwe: ibyakozwe na JADF mu mezi 6 ashize, aho imihigo igeze, imibereho y’abarokotse Jenoside yakorewe Abatutsi n’ibindi.

Umuyobozi wa JADF Karongi, Bwana Uwiragiye Raymond yahaye ikaze abitabiriye inteko rusange, abashimira uko bayitabiriye ku bwinshi, aboneraho no kubifuriza umwaka mushya wa 2025, abasaba gukomeza; gutanga ibitekerezo byubaka no kugira uruhare mu guteza imbere Akarere ka Karongi.

Atangiza Inteko rusange y’ihuriro ry’abafatanyabikorwa b’Akarere, Umuyobozi w’ako w’agateganyo Muzungu Gerald.

yashimye iri huriro uburyo rigira uruhare mu iterambere ry’imibereho myiza y’abatuye aka Karere, asaba gukomeza kuganira no guhuza imbaraga ngo birusheho.

Abitabiriye Ihuriro ry’abafatanyabikorwa b’Akarere ka Karongi, bagaragarijwe aho imihigo 122 y’Akarere y’umwaka 2024/2025, igeze ishyirwa mu bikorwa ndetse n'imibereho y'abarokotse Jenoside yakorewe Abatutsi, buri wese asabwa uruhare rwe mu gukemura ibibazo byaba bihari.

Umuyobozi w’Ingabo mu Turere twa Karongi na Rutsiro, Maj. Alphonse Ruyombyana yavuze ko ikibazo cy’amacumbi ku barokotse Jenoside yakorewe Abatutsi, abagize JADF bahagurutse bagafatanya n’ubuyobozi bw’Akarere cyakemuka mu gihe gikwiye.

Ikibazo cy’abarokotse Jenoside yakorewe Abatutsi mu Karere ka Karongi, bakeneye amacumbi 668, hari bamwe mu bagize JADF bagaragaje icyo bazakora. Umuyobozi wayo mu Karere Uwiragiye Raymond yavuze ko bazakiganiraho birambuye mu mwiherero w’abafatanyabikorwa b’Akarere uzaba vuba.

Visi Perezida w’Inama Njyanama y’Akarere, Ngarambe Vedaste yashimiye ihuriro ry’abafatanyabikorwa, uruhare bagira mu guhindura ubuzima n’imibereho by’abaturage. Asaba kuyikomeza ikagira icyo ihindura ku buzima bw’Akarere, mu iterambere ryihuse riciye mu mpinduka zigaragara.