Ingabo z’u Rwanda na Polisi y’Igihugu batangije ibikorwa bihuriweho byo gusuzuma no kuvura abaturage basanzwe bashaka serivisi z’ubuvuzi. Iki gikorwa kirimo kubera mu Bitaro Bikuru bya Kibuye, kirakorwa n’abaganga b’inzobere bo mu Ngabo na Polisi by’u Rwanda.

Iki gikorwa cyabaye ku wa 15 Gicursi 2024, cyatangijwe n’Umuyobozi w’Akarere ka Karongi Madamu MUKASE Valentine ari kumwe n’Umuyobozi w’Ingabo muri Burigade ya 201 Brig Gen Albert RUGAMBWA, uwa Polisi mu Karere CIP Augustin MBONYUMUGENZI n'Umuyobozi w'Ibitaro Bikuru bya Kibuye Dr AYINGENEYE Violette.

Ni muri gahunda y’inzego z’umutekano yo kwegera abaturage mu iterambere ry’ igihugu, ‘Defence and Security Citizen Outreach Programme’, ifite insanganyamatsiko: “Imyaka 30 yo kwibohora, ku bufatanye bw’Ingabo z’Igihugu, inzego z’umutekano n’abaturage mu iterambere ry’ u Rwanda.”