Akarere ka Karongi karimo gusaranganya ubutaka imiryango 237 yatujwe muri Rugabano IDP Model. Kifashishije Frw miliyoni 550 mu gukemura ibibazo by'inzu yubakiwe; hashyirwa imirindankuba, guha agakiriro amashanyarazi akwiriye, gukosora inzira z'umwotsi no kubaka ubwiherero bushya.

Abatuye muri uyu mudugudu bahawe amatungo arimo inka n’ingurube, ndetse banashyirwa mu matsinda yo kwizigamira, aho 26 bibumbiyemo amaze kwizigama miliyoni 26 Frw. Ni mu gihe abageze mu za bukuru bahabwa inkunga y’ingoboka.

Ku bufatanye n’abafatanyabikorwa b’Akarere, urubyiruko rwo muri uyu mudugudu wa Rugabano rwigishijwe ubudozi, ububaji, ab’inkwakuzi bibafasha kwihangira umurimo ubu bakorera mu gakiriro ka Rugabano kari muri uyu mudugudu.

Muri uyu mudugudu hatujwe abaturage barenga 1600, biganjemo abimuwe mu misozi y’Umurenge wa Rugabano yo mu Kagari ka Gitega na Kabuga. Bahawe amahugurwa yo gusoroma icyayi bibahesha akazi abandi bahabwa akazi mu ruganda rw’icyayi rwa Rugabano.