Imashini ibyaza amazi amashanyarazi

Umurenge wa Mutuntu wari mu mirenge 10 igomba kugezwamo amashanyarazi byihutirwa muri uyu mwaka wa 2020, nkuko byatangajwe mu nama y’Igihugu y’umushyikirano 2019, kuri ubu uyu murenge wavuye mu mwijima nawo ukaba umaze kubona amashanyarazi babikesha umugezi wa gatare, ahubatswe urugomero rutanga Kilowate16.

Akagezi ka Gatare niko katunganyijwe kabyazwa amashanyarazi

Akagezi ka Gatare wakomoweho uyu muriro, kiroha mu mugezi wa Mbirurume.Umuriro ukaba umaze kugezwa mu Kagari ka Gasharu, umudugudu Nyabiguri, ku ikubitiro hacanirwa aga santere ka Mukungu , hakaba  hari ikizere ko ugomba kuzongerwa ugacanira n’utundi tugari, nyuma yuko uru rugomero rushyizwe mu mabaoko y’akarere, nako vuba aha kazarumurikira EUCL ubundi nabo bashake uko barwongerera ubushobozi baruhuzi n’umurongo mugari w’amashanyarazi, dore ko uyu murenge, usibye Akagari kamwe ka Byogo, nta muriro w’amashanyarazi wawugeragamo ukaba ari nawo wonyine mu Karere wari usigaye utamurikiwe.

Urugomero rw'amashanyarazi rwubatswe hafi y'akagezi ka Gatare

Ibikorwa byo gutunganya uru rugomero byatangiye muri Mutarama/2018, rwuzura muri Kamena/2018 rutangira gukora mukwa mu Ukuboza /2018, kuri ubu rumaze umwaka wose rucanira iyi santere, ibarizwamo isoko rya Mukungu.

Nsengiyumva R. Songa Umunyamabanga nshingwabikorwa w’umurenge wa Mutuntu, avuga ko iki gikorwa ari icyo kwishimirwa kuko uyu muriro w’amashanyarazi, waje ukenewe, kuko bitoroshye ko muri iki gihe ahantu hatera imbere hatagerwa n’amashanyarazi.

Anaclet Ndahimana ushinzwe ingufu muri SNV(uhereye i bumoso) na Ndamyeyezu Fidele, Umujyanama wa Komite Nyobozi y'Akarere bahererekanya impapuro zegurira karere ru rugomero

Anaclet Ndahimana ushinzwe ingufu muri SNV avuga ko iki gikorwa bakoze kizafasha abaturage baturiye uru rugomero, kandi biteze ko kizatanga umusaruro ufatika nkuko basanzwe bafatanya muri byinshi n’akarere ka Karongi, barahari ngo bafashe abaturage mu iterambere ryabo.

SNV ni umushinga ukora ku nkunga y’Ubaholandi, SNV ikaba ari n’umufatanyabikorwa w’Akarere ka Karongi aho bafite imishinga igamije guteza imbere ubuhinzi bw’imboga n’imbuto hagamijwe kuzamura imirire no kugeza ku masoko, Uru rugomero rufite ingo n’ibigo 109 bimaze kurufatiraho, rutanga umuriro ku ngo z’abaturage 59, hakiyongeraho ibigo bya leta birimo Amashuri (E.P na E.S Mukungu), Sacco, Ivuriro, Ibiro by’Umurenge, Ikigo nderabuzima, na paroisse Gatorika ya Mukungu.

Uru rugomero rutanga kilowate 16 (16Kw), ku byumva neza uru rugomero rutanga amashanyarazi ari hasi inshuro 750 ugereranyije n’utangwa n’urugomero rwa Ntaruka, uru rugomero rukaba rwaruzuye rutwaye asaga Miliyoni Mirongo itanu n’ebyiri ibihumbi arenga.