Kuri uyu wa 12/11/2019, mu  turere twose tw’Igihugu hatangiye  gukusanywa ibitekerezo by’abaturage bizashyirwa muri gahunda y’ibikorwa 2020/21 by'Uturere ndetse  no kubagaragariza uko ibyo batanze umwaka ushize (2019/20) byinjijwe mu ngengo y'imari, ibitaragiyemo n'impamvu.

Ku rwego rw'Akarere ka Karongi  iyi gahunda iyatangirijwe mu Murenge wa Gishyita, Akagari ka Kigarama, aho yitabiriwe n’umunyamabanga Nshingwabikorwa w’Akarere, Karangwa James wari kumwe n’Intymwa ya LODA.

Muri iki gikorwa, abaturage batanze ibitekerezo binyuze mu midugudu aho bagiye muri buri mudugudu bagiye bagaragaza ibikorwa bitatu babona byashyirwa mu ngengo y’imari y’umwaka utaha 2020/2021, banagaragarizwa bimwe mu bitekerezo bari batanze umwaka ushize, 2019/2020, bitashyizwe mu mihigo y’Akarere ndetse na Action Plan.

Iyi gahunda yo gusanya ibitekerezo by’abaturage izasozwa mu mpera z’Ugushyingo 2019;  ibitekerezo byose bikusanyirizwe ku Mudugudu, bigezwe ku Kagari, nako kabishyikirize Umurenge maze bihabwe Akarere, hanyuma kabisesengure, iby’ingenzi byinjizwe muri gahunda y’ibikorwa y’umwaka wa 2020/21 y’Akarere hagendewe  ku mikoro gafite no ku bishobora gukorwa n’abaturage mu bushobozi bwabo.