I Gatwaro mu Murenge wa Bwishyura mu Karere ka Karongi, habereye igikorwa cyo kwibuka ku nshuro ya 30 Jenoside yakorewe Abatutsi, biciwe i Nyamishaba, Kuri Paruwasi Saint Pierre, Home Saint Jean no kuri Stade Gatwaro, ahanashyinguwe imibiri 60 yabonetse muri imwe mu mirenge y'Akarere ka Karongi.

Ni umuhango watangiwe no kunamira Abatutsi bashyinguwe kuri izo nzibutso, gushyiraho indabo,uza gusozwa no gushyingura mu rwibutso rwa Gatwaro, imibiri y'Abatutsi isaga 60 yabonetse mu Mirenge yo ya Gitesi, Bwishyura, Rugabano, Mutuntu na Rubengera. #Kwibuka30

Umuyobozi w’Akarere ka Karongi Madamu MUKASE Valentine yatangiye aha icyubahiro Abatutsi bishwe muri Jenoside yakorewe Abatutsi mu 1994, anihanganisha abayirokotse, ashimira n’ubutwari bukomeje kubaranga, ubu bakaba babayeho neza; bariyubatse.

Yakomeje avuga ko Jenoside yakorewe Abatutsi bari batuye mu makomini 9 yari agize iyari Komini Kibuye yakoranwe ubukana n’ubugome bukomeye, itijwe umurindi n’uwari ku isonga, Perefe wayo Kayishema Clement.

Mukase “Muri Jenoside ku mabwiriza y’uwari Perefe Kayishema Clement, ubutegetsi bwakusanyije Abatutsi ngo bajye mu yari Stade Gatwaro, bababeshya ko bahabarindira, nyamara bwari uburyo bwo kubegeranya ngo babone uko babica bose.”

Uwurukundo Julienne warokokeye ku Kibuye, mu buhamya bwe yagaragaje uburyo Abatutsi bagiye bicwamo. By’umwihariko avuga ko yakubiswe ubuhiri, agaterwa inkota, bakamujyana kumushyingura bazi ko yapfuye. Ubu abayeho neza, akora mu nzego z’ubutabera, abutanga neza ntawe arenganya.

Perezida wa Ibuka mu Karere ka Karongi, NGARAMBE Vedaste yahumurije abarokotse Jenoside yakorewe Abatutsi mu 1994, ko nta Jenoside izongera kubaho n'imvugo z'urwango zabwirwaga Abatutsi muri icyo gihe. Yungamo ko bamaze kwiyubaka, bafite umutekano wuzuye hose kurenza interineti.

NGARAMBE ati “Julienne, hari amagambo wavuze atazongera kugaruka; nta seta yicirwaho abantu, nta nduru, nta firimbi, nta tubatsembatsembe bizongera kubaho, kubera ko dufite ubuyobozi bwiza burangajwe imbere na Nyakubahwa Perezida wa Repubulika watumye twongera kugira agaciro.”

Guverineri w’Intara y’Iburengerazuba, Hon. DUSHIMIMANA Lambert yakomeje abarokotse Jenoside yakorewe Abatutsi, abayikoze batifurizaga ko hagira usigara. Ashimira Ingabo za FPR Inkotanyi, avuga ko zikeshwa kongera kubona u Rwanda ruzima no kongera kubona ubuzima.

Yavuze ko kwibuka bijyana no gusabira abo Jenoside yatwaye ubuzima, kugirango Imana yakire roho zabo, kuzirikana ubutwari bw’abarokotse bihanganiye ibikomere bikomeye bahuye nabyo, banagihura nabyo. Yasabye kugaragaza abagoreka amateka ya Jenoside, abayipfobya n’abayihakana.

Uyu muhango wasojwe no gushyingura mu cyubahiro mu rwibutso rwa Gatwaro, imibiri 60 yabonetse muri imwe mu mirenge y'Akarere ka Karongi, kunamira ihashyinguye isaga ibihumbi 15, no gushyiraho indabo ndetse no gukaraba.