Ku wa 31 Gicurasi 2026 ku bitaro bya Kibuye mu Karere ka Karongi habereye igikorwa cyo kwibuka abana n’abagore, abakozi, abarwayi n’abarwaza bishwe muri jenoside yakorewe Abatutsi mu 1994.

Umushyitsi Mukuru yari Hon. UWAMARIYA Odette wari uyoboye itsinda ry’abadepite basuye Akarere ka Karongi, haru Umuyobozi w'Inama Njyanama y'Akarere ka Karongi akaba na Perezida wa IBUKA muri aka Karere, Bwana NGARAMBE Vedaste , Umuyobozi w'Akarere ka Karongi, Bwana MUZUNGU Gerald , Abahagarariye Inzego z'Umutekano mu Karere ka Karongi, Umuyobozi w'Akarere wungirije ushinzwe imibereho , Abajyanama mu nama Njyanama y,Akarere , Umuyobozi Mukuru w'ibitaro bya Kibuye, Umuyobozi w'ikigo cy'imyuga n'ubumenyi Ngiro (Rwanda Polytechnic  Karongi),Umuhuzabikorwa wungirije w'inama y'Igihugu y'Abagore ku rwego w'Intara, Umuhuzabikorwa wa CNF ku rwego rw'Akarere n'Abagize Komite y’inama y’Igihugu y’Abagore ku rwego rw'Akarere, Umunyamabanga Nshingwabikorwa w'Umurenge wa Bwishyura, -Abayobozi b'amashami ku Karere no ku Bitaro bya Kibuye, -Abakozi b'ibitaro bya Kibuye n'abayobozi b'Ibigo Nderabuzima ,Abafatanyabikorwa  abayobozi b'amadini n'amatorero, Abaturage b'Umurenge wa Bwishyura, abavandimwe n'inshuti baje kwifatanya n'Akarere muri iki gikorwa. 

Bimwe mu byaranze iki gikorwa birimo umunota wo Kwibuka, isengesho ryatanzwe na Padiri Mukuru wa Paruwasi ya Kibuye, ijambo ry,ikaze ryatanzwe n'Umuyobozi Mukuru w'ibitaro bya Kibuye, kiganiro ku mateka yaranze Jenoside yakorewe Abatutsi n'urugamba rwo guhagarika Jenoside no kongera Kubaka Igihugu bishingiye ku bumwe bw'abanyarwanda na Ndi Umunyarwanda cyatanzwe na ABIMANA Mathias, indirimbo zo n’Ubuhamya bwatanzwe na Madamu NYINAWAGAGA Clemence bijyanye n'inzira yo kwihisha no kurokoka muri jenoside yakorewe Abatutsi ku Bitaro bya Kibuye aho yari yahungiye. 

Yakurikiwe n’ijambo ry'uhagarariye imiryango y’abiciwe mu bitaro Bwana HABARUGIRA Isaac , ijambo ry’Umuhuzabikorwa w'inama y’Igihugu y’abagore mu Karere ka Karongi Madamu NYIRAKABIKIRA Louise, ijambo ry'umuyobozi wa IBUKA mu Karere ka Karongi akaba n'Umuyobozi w'inama Njyanama Bwana NGARAMBE Vedaste n’ijambo ry'umushyitsi mukuru Honorable UWAMARIYA Odette.

Abayobozi batanze ubutumwa bwagarutse ku gufata mu mugongo abarokotse Jenoside yakorewe abatutsi no kwihanganisha Ababuze ababo muri Jenoside ,kubahumuriza , gushimira ingabo zahoze ari iza FPR inkotanyi zari ziyobowe na Nyakubahwa Perezida wa Repubulika Paul KAGAME zahagaritse Jenoside yakorewe Abatutsi, zikabohora abanyarwanda ingoma y’abicanyi , zikongera Kubaka Igihugu cyubakiye ku bumwe ,ubwiyunge n'ubudaheranwa bw'abanyarwanda. 

Ababyeyi kandi basabwe gukomeza kwigisha abana n'urubyiruko amateka y,Igihugu ,kwirinda kuyagoreka , no kuyubakiraho twubaka ubumwe bwacu ,buzira amacakubiri n'ingengabiterezo ya Jenoside. abitabiriye Kandi basabwe gutanga amakuru y,ahajugunywe abatutsi bishwe muri Jenoside kugira imibiri ishyingurwe mu cyubahiro. Umushyitsi Mukuru akaba yashoje akomeza kwihanganisha abitabiriye no gukomeza Kubaka Igihugu kizira Jenoside n'ingengabiterezo yayo nkuko biri mu itegeko Nshinga rya Repubulika y'uRwanda, kandi ko Igihugu cyapfuye rimwe kikazuka  kitazongera gupfa  ukundi  ."Twibuke Twiyubaka" .