Mu Midugudu yose igize Akarere ka Karongi, habereye  muganda usoza ukwezi kwa Nzeri 2024, wibanze ku gutunganya imihanda. Ku rwego rw’Akarere wakorewe mu Murenge wa Bwishyura mu Kagari ka Gasura mu Mudugudu wa Gisayo ahatunganyijwe umuhanda wari warasibye ufite uburebure bwa km 1,5.

Uyu muganda wakozwe ku wa 28 Nzeri, witabiriwe n'abayobozi barimo Guverineri w'Intara y'Iburengerazuba Hon Dushimimana Lambert, wari umushyitsi mukuru, Umuyobozi w'Akarere Madamu MUKASE Valentine, Umuyobozi wa Polisi mu Karere n'abandi barimo abakozi n'Umurenge wa Bwishyura n'abaturage.

 Ni mu gihe Umuyobozi w' Akarere wungirije Ushinzwe iterambere ry' ubukungu Bwana NIRAGIRE Theophile yawukoreye mu Kagari ka Kareba mu Murenge wa Murundi.

Ibyakozwe muri rusange ni ugusibura inzira z' amazi, guharura imihanda, kubumba amatafari, gutinda amateme yangiritse no guucukura ubwiherero bw'imiryango itishoboye.

Nyuma y'Umuganda, abawitabiriye bagejejweho ubutumwa bukurikira:
 Umuforomo waturutse kuri C.S ya Kibuye yatanze ubutumwa bwa Minisiteri y'ubuzima kuri gahunda yo kwirinda no guhangana n'indwara y'umuriro mwinshi iterwa na Virus ya MARBURG no gushishikariza Ababyeyi kujya bapimisha inda inshuro umunani(8)
 
Umuyobozi w'Akarere yatanze ikiganiro cya Minisiteri y'ubutegetsi bw'Igihugu kuri gahunda yo gukura Abaturage mu bukene, kurushaho kugira isuku, ubutumwa bwo kwirinda ibiza, kurengera ibidukikije birinda gutwika amashyamba n'Ubutumwa bwa Rwanda Revenue bushishikariza abasora kujya bibuka gutanga inyemezabwishyu ya IBM.
 

Umuyobozi wa Polisi mu Karere ka Karongi yatanze ikiganiro ku Mutekano.

Guverineri w'Intara y'Iburengerazuba yashoje inama ageza ku baturage ubutumwa bujyanye no kwirinda amakimbirane mu muryango kuko ari intandaro y'ibibazo byinshi byugarije umuryango birimo ubukene, kutiga kw'abana, igwingira ry'abana...

Muri iki gikorwa kandi, Umufatanyabikorwa w'Akarere World Vision yahembye abagore bubahirije amabwiriza yo gupimisha inda inshuro enye. Abaturage babwiwe ko ubitaha hazahembwa abazapimisha neza inda inshuro 8.

Muri rusange abaturage baganirijwe ku kwitegura igihembwe cy' ihinga 2025A, Mituweli, Uburyo bwo kwirinda indwara z' ibyorezo, Kwipimisha inda incuro 8 no kubyarira kwa muganga, Kwirinda amakimbirane yo mu ngo, Umutekano, Ejo Heza no gusubiza abana mu ishuri.