Hon. Depite TUMUSHIME Francine na NDORIYOBIJYA Emmanuel bifatanyije n’abatuye Karongi mu muganda rusange, bari muri aka Karere mu gihe cy’icyumweru mu rwego rwo kugenzura imitangire ya serivisi, basura inzego zitandukanye n’abaturage kuri iyo ngingo. Muri uyu muganda usoza ukwezi kwa Gicurasi bifatanyije na Meya n’abagize inzego z’umutekano ndetse n’abaturage. Ni Umuganda wabaye ku wa 31 Gicurasi 2025,  wabereye  mu Murenge wa Rwankuba, Akagari ka Munini, Umudugudu wa Winzira, waranzwe no gusiza ikibanza kizubakirwamo umuturage utishoboye no kumubumbira amatafari.

Uyu muganda usoza ukwezi kwa Gicurasi 2025, ku rwego rw'Akarere ka Karongi wabereye mu Murenge wa Rwankuba, 

Ubutumwa bwatanzwe bwagarutse; ku gukora cyane no kwivana mu bukene, kwishyura mituweli ku gihe, kwita ku isuku n’isukura, kubungabunga ibidukikije, kwirinda indwara zandura n’izitandura n’ibiyobyabwenge, kugaburira abana indyo yuzuye no guharanira kwibohora nyako kwa Afurika.

Meya Muzungu Gerald yasabye abaturage guhinga ibirayi bigasimbura ibigori bahingaga ku butaka bafite no ku bundi butabungabunzwe uko bikwiye, hakaboneka umusaruro wabyo uhagije ujyanwa ku masoko nkuko mu Kinigi babigemura.

Hon. Depite NDORIYOBIJYA Emmanuel yasabye abaturage kwitabira sisitemu imibereho yasimbuye ibyiciro by’ubudehe, bakayifashisha mu kwishyura serivisi zirimo Mituweli no kumenya niba bahabwa serivisi nziza.

Hon. Depite TUMUSHIME Francine yasabye abaturage kureba imbere hubakiye ku bumwe n’ubudaheranwa by'abanyarwanda kandi bakirinda ubusinzi mu rwego rwo kunoza umurimo no kwirinda ubuharike.

Ku rundi ruhande, Ubuyobozi bw' Ibitaro bya Kirinda  n' Abakozi bifatanyije n'Abaturage b'umurenge wa Murambi mu muganda rusange, wanitabiriwe na Senateri NIYOMUGABO, hakorwa umuhanda wo mu kagari ka Mubuga.