Ku biro by’Akarere ka Karongi hateraniye inama ya Komisiyo y'ubukungu ya JADF, aho abayigize n’abafatanyabikorwa, barimo kugaragariza ubuyobozi bw’Akarere ibikorwa bizashyirwa mu igenamigambi ry’Akarere 2025/2026 no kurebera hamwe uburyo bwo guteza ubuhinzi bw’urutoki mu Karere.

Ku bijyanye n’ubuhinzi bw’urutoki, Umuyobozi w’Akarere, Muzungu Gerald yagaragaje ko ari kimwe mu bihingwa byafasha abahinzi bo muri aka Karere gutera imbere, bakava mu buhinzi bw’urutoki rudatanga umusaruro, bagahinga urutanga umusaruro,

Abari mu nama basanga intambwe ya mbere ikwiye, ari ukureba uburyo abahinzi babona intsina zibafasha kubona umusaruro uhagije; mu gutangira hakwibandwa ku musaruro, wamara kuboneka inganda ziwutunganya nazo zigasanga abaturage, bakaziwugurisha bakiteza imbere.

Kugirango bigerweho, hagaragajwe ko ari ukwitabaza ikigo gishinzwe iterambere ry’ubuhinzi (RAB), ku bijyanye no kubona urutoki rubereye agace ruhingwamo, rufasha abaturage kongera umusaruro ndetse no kuba rutafatwa  n’indwara zikunze kwibasira urutoki, nka kabore, cyumya n’izindi.

Mu karere ka Karongi hateye imbere ubuhinzi bw'icyayi, ikawa n'ibirayi mu duce twegereye ishamba Kimeza rya Nyungwe, ariko n'urutoki usanga ruri mu bihiganje.