Tariki ya 29 Werurwe 2023, Akarere ka Karongi gafatanyije n’abafatanyabikorwa bako barimo WASAC, Water for People na World Vision bizihije umunsi wahariwe amazi (Water Day ).

Uyu munsi wizihijwe hatahwa imiyoboro ibiri y’amazi n'ikigo cy'isuku n'isukura (District Sanitation center) . Iyo miyoboro  irimo:  Umuyoboro Rugobagoba-Tongati-Kazibaziba ufite uburebure bwa kilometero 68.2 uha amazi abaturage n’abafatanyabikorwa b’akarere basaga ibihumbi 22. Uherereye mu mirenge ya Ruganda, Gashari na Murambi.

Undi ni Umuyoboro wa Mukura Rubengera uha amazi abatuye mu Murenge wa Rubengera [ugera ku bihumbi 26] ufite uburebure bwa kilometero 47. Muri rusange iyi miyoboro iha amazi abaturage basaga ibihumbi 48.

Ibi bikorwa byakozwe ku bufatanye bw’Akarere ka Karongi n’abafatanyabikorwa bako barimo WASAC, World Vision, Water for People na  byatwaye amafaranga y’u Rwanda asaga miliyari  imwe na na miliyoni 614 (Frw 1,614,956,327).

Ku bijyanye n’amazi meza, Akarere ka Karongi kari kuri 75.20%, ni ukuvuga abaturage badakora urugendo rurengeje metero 200 bagera ku mazi meza ku batuye mu mijyi, na 500 ku batuye mu cyaro.

Ku bijyanye n’amavomo rusange akarere gafite 795 akora ku kigero cya 98%.

Umuyobozi w’akarere ka Karongi, Madamu MUKARUTESI Vestine avuga ko ubuyobozi bushyize imbere ibigamije impinduka nziza mu mibereho n’ubuzima bwiza by’abaturage, abasaba kubyitaho.

Agira ati" Uyu muyoboro twatashye uzatuma abaturage bagira ubuzima bwiza.Iyo unyoye amazi meza bikurinda indwara zituruka ku mwanda, ikindi n’igwingira rizacika kuko abantu bazaba banywa amazi asukuye bityo bibarinde inzoka.Turasaba abaturage kubungabunga ibi bikorwa remezo bahawe ntibabyangize ."

Ku bufatanye bw’akarere n’abafatanyabikorwa, Akarere ka Karongi kihaye intego ko ingo 100% zizaba zifite amazi meza mu mwaka wa 2024.