Abayobozi batandukanye bari bateraniye mu nama y’umutekano yaguye y’Akarere ka Karongi basuzumye aho imyiteguro yo kwibuka ku nshuro ya 31 Jenoside yakorewe Abatutsi igeze.

Muri iyi nama yabaye ku wa Kane tariki ya 3 Mata 2025 iyobowe n’Umuyobozi w’Akarere ka Karongi Bwana Muzungu Gerald, abayobozi bari bayitabiriye barimo abagize Komite Nyobozi y’Akarere, abagize inama y’umutekano y’Akarere itaguye ndetse n’abanyamabanga nshingwabikorwa b’imirenge, byagaragajwe ko ibintu byose biri ku murongo.

Kuri site zo kwibukiraho zisaga 20, ibintu byashyizwe ku murongo, inzibutso za Jenoside yakorewe Abatutsi zamaze gukorerwa isuku.

Bashima kandi abaturage uburyo bitabira igikorwa cyo kwibuka ku bwinshi, banabibutsa ko ari inshingano zabo gukomeza kucyitabira, kuko kwibuka ni ibya buri munyarwanda wese.

Mu Karere ka Karongi, icyumweru cy’icyunamo cyo kwibuka ku nshuro ya 31 Jenoside yakorewe Abatutsi kizatangirira ku rwibutso rwa Jenoside yakorewe Abatutsi rwa Gatwaro ku Kibuye, gisorezwe ku rwibutso rwo mu Murenge wa Ruganda.

Ubukana bwa Jenoside yakorewe Abatutsi bwagaragaye mu Bisesero no mu tundi duce, aho abicanyi baturutse hirya no hino barimo interahamwe, abasirikare n'abajandarume ba Leta yari iriho bagiye birara mu Batutsi bari aho mu Bisesero, Stade Gatwaro, kuri Komini Bwirika n'ahandi bagiye babicira mu nzira bagana kuri site bayoborwagaho ngo babone uko babicira.