Guhera ku wa  22/04/2025, mu Karere ka Karongi, ku bufatanye bw'Akarere na Imbuto Foundation harimo gukorwa ibikorwa byo gutega amatwi abangavu basambanyijwe bakabyara imburagihe.Aba bangavu kandi bari kumwe n'ababyeyi babo kugira ngo humvwe ibibazo bafite ku bufatanye bw'inzego zitandukanye bafashwe guhabwa ubutabera no gushaka ibisubizo ku bibazo bindi byagaragajwe.(GBV mobile clinics .

Iki gikorwa cyatangijwe ku mugaragaro n'Umuyobozi w'Akarere Wungirije Ushinzwe iterambere ry'Ubukungu Madamu NTAKIRUTIMANA Julienne.

Kitabiriwe kandi n'Umuyobozi w'Akarere Wungirije Ushinzwe iterambere ry'imibereho myiza Madamu UMUHOZA Pascasie, uhagarariye Imbuto Foundation KAYIRANGA Eric (Health Department). Uhagarariye umushinga Baho Neza mu Imbuto Foundation, NYAMURINDA Protais akaba n'Umuyobozi Wungirije w'Inama Njyanama y'Akarere ka Karongi n'itsinda bakorana muri uyu mushinga mu Karere ka Karongi .

Hari kandi umuyobozi wa RIB mu Karere ka Karongi, Umuhuzabikorwa wa MAJ mu Karere ka Karongi, Umukozi Ushinzwe Uburinganire n'Iterambere ry'Umuryango mu Karere, Abakozi bo muri Isange One stop center ya Kibuye, Umukozi Ushinzwe Imbonezamirire mu Bitaro bikuru bya Kibuye, Umukozi Ushinzwe  ubujyanama n'isanamitima (Psychologist), abashinzwe irangamimerere mu mirenge ya Rubengera na Rugabano, abangavu basambanyijwe bakabyara imburagihe bageze kuri 50 n'ababyeyi babo 50. 

Mbere yuko iki gikorwa cya GBV mobile clinics gutangira Abayobozi batanze impanuro zitandukanye ku bangavu bari bitabiriye hamwe n'ababyeyi babo.

Hatanzwe serivisi zikurikira :

Gutega amatwi abangavu kugira ngo bagaragaze ibibazo bafite bishakirwe ibisubizo 

Ku bufatanye na RIB,MAJ na Isange One stop, aba bangavu batanze amakuru azafasha mu gutanga ubutabera ku babasambanyije kugira ngo bazakurikiranwe.

Abana batanditswe mu irangamimerere banditswe 

Abangavu kandi bafashijwe guhabwa ubujyanama mu isanamitima 

Abana bavutse kuri aba bangavu bapimwe imikurire yabo harebwa ko nta mirire mibi bafite no kuyibarinda

Ababyeyi baganirijwe kwita ku burere bw'aba bangavu ndetse n'abana bibarutse ,no kwita ku bandi bana bafite  kugira ngo bazigirire akamaro bakagirire n'Igihugu.