Ku wa 23 Mata 2025 mu Karere ka Karongi ku bufatanye bw'Akarere n’Umushinga Imbuto Foundation hakomeje igikorwa cyo gutega amatwi abangavu basambanyijwe bakabyara imburagihe,hamwe n'ababyeyi babo kugira ngo humvwe ibibazo bafite ku bufatanye bw'inzego zitandukanye, bafashwe guhabwa ubutabera no gushaka ibisubizo ku bibazo bindi byagaragajwe.(GBV mobile clinics).

Iki gikorwa cyakorewe mu Murenge wa Gitesi, ahahurijwe Abangavu basambanyijwe bakabyara imburagihe baturutse mu Mirenge ya Bwishyura, Rwankuba na Gitesi 

Itsinda ryafashije muri iki gikorwa harimo abaturutse mu MBUTO Foundation, Mu Karere ka Karongi, muri RIB no muri Isange one stop center ya Kibuye ryakiriwe n'Umunyamabanga Nshingwabikorwa w'Umurenge wa Gitesi Bwana NSANGANIRA Vianney 

Kitabiriwe n'uhagarariye IMBUTO Foundation KAYIRANGA Eric (Health Department), Uhagarariye umushinga Baho Neza mu MBUTO Foundation Bwana NYAMURINDA Protais akaba n'Umuyobozi Wungirije w'Inama Njyanama y'Akarere ka Karongi n'itsinda bakorana muri uyu mushinga mu Karere ka Karongi, Umuyobozi wa RIB mu Karere ka Karongi, Umuhuzabikorwa wa MAJ mu Karere ka Karongi, Umukozi Ushinzwe Uburinganire n'Iterambere ry'Umuryango mu Karere, Abakozi bo muri Isange One stop center ya Kibuye, Umukozi Ushinzwe Imbonezamirire mu Bitaro bikuru bya Kibuye, Umukozi Ushinzwe  ubujyanama n'isanamitima (Psychologist), Abashinzwe irangamimerere na notariya mu mirenge ya Rwankuba, Bwishyura na Gitesi, Abangavu basambanyijwe bakabyara imburagihe bageze kuri 50 n'ababyeyi babo 50. 

Mbere yuko iki gikorwa cya GBV mobile clinics gitangira, Abayobozi bakaba batanze impanuro zitandukanye ku bangavu bari bitabiriye hamwe n'ababyeyi babo.

Hatanzwe serivisi zikurikira :

Gutega amatwi abangavu kugira ngo bagaragaze ibibazo bafite bishakirwe ibisubizo 

Ku bufatanye na RIB,MAJ na Isange One stop, aba bangavu batanze amakuru azafasha mu gutanga ubutabera ku babasambanyije kugira ngo bazakurikiranwe.

Abana batanditswe mu irangamimerere banditswe 

Abangavu kandi bafashijwe guhabwa ubujyanama mu isanamitima

Abana bavutse kuri aba bangavu bapimwe imikurire yabo harebwa ko nta mirire mibi bafite no kuyibarinda

Ababyeyi baganirijwe kwita ku burere bw'aba bangavu ndetse n'abana bibarutse no kwita ku bandi bana bafite kugira ngo bazigirire akamaro bakagirire n'Igihugu.

Igikorwa cyashoje abayobozi bashimira abitabiriye Bose banabasaba kuzashyirwa mu bikorwa inama bagiriwe bigamije "Kubaka Umuryango Ushoboye Kandi Utekanye".