Umuyobozi w’Akarere, Madamu MUKASE Valentine ari kumwe n’abagize inama y’umutekano itaguye y’Akarere, bahuye n’abanyamuryango ba Koperative y’abamotari bakorera muri aka Karere, mu rwego rwo kubamurikira komite yatowe izabayobora, abakozi b’iyo koperative n’icyo bazabagezaho.

Umuyobozi wa Brigade ya 201, Brig Gen Albert RUGAMBWA yabwiye abamotari ko bakorera mu gihugu cyiza, gifite amahoro, ituze n’umutekano bisesuye basabwa kubumbatira, bityo ko ari umwanya wo gukora bakiteza imbere; birinda icyagarura amacakubiri, ayo ariyo yose.

Umuyobozi wa Police mu Karere ka Karongi, CIP MBONYUMUGENZI Augustin yabasabye kubahiriza amategeko y’umuhanda, gutanga amakuru ku gihe, aho babonye ibyahungabanya umutekano n’ituze by’Abanyarwanda; buri wese akiyumva mu gutanga umusanzu ku gihugu cyamubyaye.