Mu Mirenge yose y’Akarere ka Karongi habereye ibirori byo kwizihiza Umunsi Mpuzamahanga w’Umugore, waranzwe: Gusezeranya imiryango 48, Kwitura inka 46 ku miryango yiganjemo iyoborwa n’abagore, Gutanga amatungo magufi, Gutanga igishoro cyo kwiteza imbere, Kumurika ibyo abagore bagezeho no Guha abana amata.

Mu murenge wa Mutuntu, ahabereye ibirori by’uyu munsi mukuru ku rwego rw’Akarere, Meya w’agateganyo yasabye abashakanye kwimakaza ubufatanye kuko butuma ingo zabo zikomera; iyo zahungabanye n'Igihugu gihungabana, yibutsa ko kandi amahoro, umutekano n’amajyambere bihera mu rugo.

Hon. Depite Ntezimana Jean Claude yasabye abagabo bari muri uyu Murenge wa Mutuntu kumanika ikiganza bagasezeranya ko batazongera kurambura akaboko ngo bakubite abagore babo, nkuko na we mu myaka 12 amaranye n’uwe atarabikora kandi abona bimwubakiye.

Ibirori by'Umunsi Mpuzamahanga w'Umugore byari bifite insanganyamatsiko igira iti : "Umugore ni uw'agaciro" byasojwe imiryango yasezeraniye ahabereye ibi birori ku rwego rw'Akarere ikorerwa ubusabane.