Gushyiraho inama mpuzabikorwa ku rwego rw’Umurenge ihuje inzego zitandukanye, igamije guteza imbere uburezi, igenzura ko nta mwana ugeze igihe cyo kwiga utarajya ku ishuri, ni zimwe mu ngamba ziyemeje abafite aho bahuriye n’uburezi bahuriye mu nama yabaye ku wa 13 Kanama 2025, yabahuje n’ubuyobozi bw’Akarere ka Karongi n’ubwa Save the children.

Abagize iyi nama bazahurira hamwe mu gihe amashuri azaba amaze gutangira muri Nzeri 2025, basuzume urutonde rw’abana bitabiriye ishuri n’abatararyitabiriye, bifashishije urutonde rusanzweho mu karere ka Karongi ruriho abana basaga ibihumbi bitatu batitabiriye ishuri, bizabafasha kugenda urugo ku rundi bareba ko nta bana Bahari batitabiriye ishuri, ubundi babafashe kurijyamo.

Ubundi buryo bazakoresha ni ukwegera ababyeyi, biciye mu bukangurambaga mu nteko z’abaturage, bifashishije gusoma urutonde rw’abana batagarutse umunsi ku wundi.  Ubundi buryo buzakoreshwa ni ukwifashisha ubutumwa buzanyuzwa mu itangazamakuru no mu nsengero bushishikariza abana bose bageze igihe cyo gutangira ishuri kurijyanwamo.

Habimana Protegene wari uhagarariye Akarere muri iyo nama asanga ari uburyo bwiza bwo guhangana n’ikibazo cy’abana usanga batajywana kwiga kandi igihe cyarageze. Asaba abafashe ibi byemezo kutabigira amasigaracyicaro, bakabishyira mu bikorwa

Ati “ Ibyo twaganiriyeho bye kuba amasigarakicyaro, mbashimiye ibyemezo byiza mwafashe, mureke dukore koko abana bose bagaruke mu ishuri. Twese dufatanye kandi kureba niba ibyo duha abana bijyana ku isoko ry’umurimo, bityo bigatuma bazagira  uruhare mu gukomeza guteza imbere igihugu.

Umuyobozi wa Polisi mu Karere ka Karongi SP Mbonyumugenzi avuga ko abaturage, harimo n’abana ari umutungo w’igihugu, ku buryo badateye imbere n’igihugu kitahatera, bityo bakwiye kwitabwaho bakajyanwa ku ishuri.

Ati “Imibereho dufite abari hano ni uko twize, dufashe n’abo bana bige kugirango bazagire imibereho myiza.”

Akomeza atanga ingero ko Jenoside yakorewe Abastutsi yagize ubukana bwo gukorwa kubera abenshi mu bari batarize bashutswe n’abari bize, bityo ngo uruhare rwa buri wese rurakenewe mu gutuma buri mwana wese w’Umunyarwanda ugeze igihe cyo kwiga ajyanwa ku ishuri, akava mu bujiji.

Ati “Uruhare rwa uri wese rurakenewe kugirango dufashe uriya mwana utazi ejo hazaza he n’uruhare kugana ishuri ruzabigiramo. Duharanire gusiga Isi ari nziza kurenza uko twayisanze.”

Ku ruhande rwa Save the children, yiyemeje gukomeza gufasha Leta mu gutuma abana bose bajyanwa ku ishuri ntawusigaye.