Binyuze muri gahunda yiswe “Igicumbi cy’imikurire myiza y’umwana”, abakozi basaga 230 bafite aho bahuriye no kwita ku buzima bw’umubyeyi n’umwana n’imirire bakorera mu mirenge 91 yo mu turere 13, bari kongererwa ubushobozi no kungurana ibitekerezo mu kunoza izi gahunda.

Iyi gahunda igamije kwigishanya hagati y’ababyeyi bahuriye mu matsinda agamije guteza imbere imirire hibandwa guhindura imyumvire n’imigirire. Aba bakozi bazongerera ubushobozi abandi babyeyi batowe mu midugudu bazwi nka “Bandebereho” na bo bakazigisha ayo matsinda y’ababyeyi.

Umuyobozi wa NCDA, Madamu Ingabire Assumpta yasuye aba bakozi, abibutsa gushyira imbaraga mu kwita ku buzima bw’umubyeyi n’umwana nk’igisubizo mu guhangana n’igwingira. Yabasabye kwisuzuma no gushingira ku musaruro uzana impinduka uva muri gahunda zisanzwe nka kimwe mu bizafasha kumenya aho kongera imbaraga.